क्राइम

खळबळजनक! ठाणे पोलीस आयुक्तांचे व्हॉट्सॲप खाते हॅक; स्टेटसवर आक्षेपार्ह व्हिडिओ प्रसारित

ठाणे (प्रतिनिधी): सायबर गुन्हेगारांनी थेट कायद्याच्या रक्षकांनाच लक्ष्य केल्याचा धक्कादायक प्रकार समोर आला आहे. ठाणे शहर पोलीस आयुक्त आशुतोष डुंबरे यांचे व्हॉट्सॲप (WhatsApp) खाते अनधिकृतपणे हॅक करण्यात आले आहे. हॅकर्सनी या खात्याच्या व्हॉट्सॲप स्टेटसवर काही आक्षेपार्ह आणि अश्लील व्हिडिओ प्रसारित केले आहेत. या घटनेमुळे एकच खळबळ उडाली असून ठाणे पोलीस आयुक्तालयाने तातडीने प्रसिद्धीपत्रक काढून नागरिकांना सतर्क राहण्याचे आवाहन केले आहे.
दिनांक १७ नोव्हेंबर २०२६ रोजी हा प्रकार निदर्शनास आला. यासंदर्भात ठाणे शहर पोलीस आयुक्तालयाचे वरिष्ठ पोलीस निरीक्षक तथा जनसंपर्क अधिकारी शैलेश साळवी यांनी अधिकृत प्रेसनोट जारी केली आहे. यामध्ये त्यांनी स्पष्ट केले आहे की, पोलीस आयुक्तांच्या व्हॉट्सॲप खात्याचा ताबा अज्ञात हॅकर्सनी घेतला असून त्यावरून आक्षेपार्ह मजकूर पसरवला जात आहे.
पोलिसांचे नागरिकांना महत्त्वाचे आवाहन:
या घटनेच्या पार्श्वभूमीवर नागरिकांनी खालील गोष्टींची काळजी घ्यावी, असे आवाहन पोलिसांनी केले आहे:

१. आयुक्त आशुतोष डुंबरे यांच्या व्हॉट्सॲप स्टेटसवर दिसणाऱ्या कोणत्याही व्हिडिओवर विश्वास ठेवू नये.
२. असे आक्षेपार्ह व्हिडिओ डाउनलोड, फॉरवर्ड किंवा प्रसारित करू नयेत.
३. या क्रमांकावरून येणाऱ्या कोणत्याही संशयास्पद मेसेजला किंवा लिंकला प्रतिसाद देऊ नये.
४. या घटनेबाबत कोणतीही अफवा पसरवू नये.
दरम्यान, सायबर पोलिसांच्या मदतीने हे खाते पुन्हा ताब्यात घेण्याची प्रक्रिया सुरू असून, हे कृत्य करणाऱ्या अज्ञात हॅकरविरोधात कडक कायदेशीर कारवाई करण्यात येत असल्याची माहिती पोलीस प्रशासनाने दिली आहे. नागरिकांनी या घटनेची गांभीर्याने नोंद घेऊन पोलिसांना सहकार्य करावे, असेही आवाहन करण्यात आले आहे.

Leave a Reply

Your email address will not be published. Required fields are marked *

Back to top button
Click to listen highlighted text!
error: Content is protected !!